Co le nuove tecnologie la comunicazion la vien senpre pì svelta, se sa duto n pressa parchè se ciata duto su internet. Alora, zenza diventà s-ciave, bisogna nparà a dorà ste tecnologie, parchè le serve a comunicà e a difonde idee e progete.

L’Union Ladina da cuasi diese ane l à l sito www.ladinia.org agno che se po ciatà nformazion su le nostre tradizion, chel che é la nostra lenga, chel che é stou fato nte sti ane pa sostegnì e idà la nostra dente.

Da n an avon tacou na colaborazion co la scola media de Loze e i tosate à sistemou calche pagina del sito e i fararà na parte dedicada ai dovin che vive n Cadore.

Avon de bisuoi de coinvolge i dovin, parché i é luore che ntel doman dovarà vive nte sti luoghe. Alora, va ben tole su le testimonianze de na ota e fei musei parché i pì dovin sapie come che era na ota, ma dovon anche vardà ndavante, fei parlà i dovin ntra de luore par ladin, feili dorà l ladin anche co le nuove tecnologie.

E par discute e dibate sui probleme del mondo ladin, avon verto anche sto blog  agno che dute chi che vo po ntervegnì, domandà, mete su letere, idee, foto, video.

Ades la discussion é verta su pala autonomia de la provinzia e al referendum par otegnila. L blog vo animà la discussion su chel che la dente pensa che se abie da fei, par feine sta meo noi e i nostre fioi:  se po ntervegnì pa riportà testimonianze, pa scrive poesie n ladin, pa domandà nformazion, pa contribuì à fei algo pa la nostra dente.

Dute chi che dora n conpiuter colegou a internet po portà idee e discussion. Dute apede, se po zercà de costruì n futuro meo  de chel che avon davante i oce.

Francesca Larese Filon

Foto: Flickr (Extra Ketchup)

Condividi l'articolo:

•