N SPORTEL LADIN VIEN VERTO ANCHE A LOZE

Daspò che é stade verte sie sportiei ladins da parte de l’Istituto ladin de la Dolomites, é vegnesta l ora anche pal comun de Loze de dà sto servizio ala dente. Tra calche dì na tosata de Loze la tacarà a fei chesto laoro pa n an.

Ma n chè consistelo n “sportel ladin?“. Ale curte, al dovarae fei chel che fa n ufizio turistico, solo che al posto de nformazion turistiche al dovarae dà nformazion sula ladinità dei nostre luoghe, zercà de spiegà chi che son e le nostre rason.

A chi se rivolgelo sto sportel? A dute chi che zerca nformazion leade al mondo ladin, tanto dente nostrana che foresta.

Al servizio l vien fato n grazia dei schei che é stade ciapade dal comun de Loze pa la lege 482/99 . La tosa la ciaparà posto do n Comun: oltre a dà  nformazion par ladin, la zercarà de tegnì nota dele esigenze che dovese sautà fora, senpre che le sea leade ai probleme dela nostra tera e ale nostre tradizion. La tacarà a traduse algo dal talian al ladin, par difonde l scrive n ladin (la scritura n ladin).

Savon ben che l ladin é na lenga parlada e che son poco usade a scrivelo. Pa nparà a scrivelo ben, la dovarà fei n corso nte l Istituto Ladin de la Dolomites, apede i tosate che é davoi chiautre sportiei.

I spietarà anche de menà la dente foresta e la nostrana a vede la Ruoia dei Mulin de Loze e l Museo de la Lataria; la darà na man a scrive sia pal blog che pal sito dell’Union Ladina.

Sti corse, destinade par ades ai tosate dei sportiei, speron de feili anche nte le scole, parchè no core tanto pa capì che l nostro futuro l é fato dai nostre fioi. Ntanto, augurando a sta tosata de fei n bon laoro, parton co sto “sportel ladin“.

Francesca Larese Filon

Condividi l'articolo:

•