NA SPORTA PAR FEINE PENSA’ AL NOSTRO LADIN CADORIN!

L’Union Ladina del Cadore de Medo à da pocio stanpou ncuante sporte de coton co n disegno creou da n tosato de la scola elementar de Cialauz, che l é stou premiou nte l insuda passada.

La sporta la vegnarà distribuida nte le scole e a la dente e la podarà ese dorata par portà ntin de duto, cossì che, anche se no par, co la sporta porton n giro anche l idea de esse chi che son: dente ladina.

Visin al disegno avon metesto la scrita “son cadorin e parlo ladin”, a volé recordà ala nostra dente che chel che noi ciamon “l nostro dialeto”, chel che uson dute i dì pa parlase, autro no é che una dele tante parlade ladine dele val dolomitiche che, dute nsieme, le forma la lenga ladina.

Savon dute che no é na sporta che tutela na lenga o na tradizion: ma é anche vero che ntel core avanti e ndrio de ogni dì, se propio dovon ciatà algo che ne recorde chi che son, l idea dela sporta ne à paristo la pì bela.

Al tosato che à fato l disegno e duta la scola elementar de Cialauz à da esse orgoliose de sta sporta che girarà par duto l Cadore .

Ale mare de famea digo … farela usà dai vostre fioi, che l nostro doman dipende tanto da luore. N tin pi n tin fa n ton.

Francesca Larese Filon

Condividi l'articolo:

•