Attività svolta nel 1998
CHEL CHE AVON FATO N TEL 98.
PAR I DOVIN
E stou organizou nte dute le scole del Cadore lezion su la tradizion, la storia, l'ambiente de le nostre val: lezion pagade da la Comunità Montana che à portou nte le medie de Auronze, Lorenzago, Domeje, Cialauz, S. Vido, al Liceo Linguistico de Auronze e a la Scola Profesional de Pelos profesori e maestri a spiegà algo de la nostra dente e de che che é stou nte i ane . I dovin à dimostrou ntares de savè algo de pi' de la nostra tera
PAR DUTE
Nte ogni comun avon organizou na conferenza su storia, tradizion e dialeto ladin (I comun à decidesto l'argomento)
PAR I PROFESORI
E stou tacoù il primo an del corso de agiornamento par i profesor su storia cultura e tradizion de la nostra tera : par 6 daspomedodì 40-50 profesor é stade a sientì le lezion e a descore nte la sala de la Magnifica Comunità
L PROGRAMA EUROPEO LEADER II
Sto an é stou particolar par la pasion che avon ciapoù su le iniziative de l'Union Europea pa la promozion de le "zone rurali". L Pian de Azion Local de la nostra zona à nfati metesto come necesario la valorisazion de la cultura e tante solde é stade meteste nte progete de studie su la nostra cultura, su le zone de ntares storico , su l'ambiente, su le ciase vece, sul savè fei de na ota da nsegnà ai dovin. E propio par chesto avon deciso che podea ese nostro compito fei n modo de fei cognose a dute ste posibilità e duto chel che se podarà fei n doman grazie a sti fonde. Par sto motivo avon fato domanda par fei la divulgazion de l Leader e l nostro progeto è stou l meo. Da agosto stason laurando par fei cognose a dute i programi de l'Europa e da dezembre tacon chel par fei vede chel che se sta fasendo.E n esperienza dura par n asociazion cultural come la nostra che laora sui volontarie ma credon de pode' fei un bon laoro a vantagio de dute.
L CENTRO DE CULTURA POPOLARE DE PELOS E L PROGRAMA SOCRATES
Grazie a la Comunità Montana Centro Cadore sta dendo avante i laore par la sistemazion de ciasa Agnoli che deventarà anche la nostra nuova sede. Se spera che par l'insuda che vien se podaron sposta' e là podaron mete duto l material tiroù su nte sti ane.E col Centro sta dendo avante Ia rizerca su Ia tardizion dei laore co le bestie: studio finanziou medo da l'Union Europea (e l'autra la mete Comunità Montana) ntra i finanziamenti che la CEE da par la protezion de le minoranze linguistiche .
L'ISTITUT CULTURAL LADIN
No é manciade le barufe co la Federazion par fei su anche da noi l'Istitut cultural ladin come che é stou fato nte la val de Fasa e Badia. L bel é che dute le Union lo volarae fora che Fodom, Col e Ampezo e la Federazion à dito piche. No se capisce parchè i tira l cu' ndrio su na roba cosi nportante par i Ladins del Veneto. Forse che i à paura che daspò padaresone contà anche noi o chi che é ncora fora de la Federazion. Me par che i varda ndrio nvenzi de vardà navante e muovese parchè i Ladins del Veneto riese a fei compai de chi de le autre val visin a noi.
‘LA FEDERAZION DEI LADINS N TEL VENETO
Nia de nuou: avon fato domanda de ese meteste inte ma i ne à respondesto che dovon spietà che rue la nuova lege par la tutela de le minoranze (che è trenta ane che i à da fei). E' ciaro che la Federazion no vo savè gnente de noi: ma se è inte i Ladins de la Val del Boite e i Comelean no capison parchè noi che son ntel medo avon da sta fora!Ma parlà no serve a nia: i nostre Ladins de la Federation crede che solo chi che era sote l'Austria sea vere Ladins e che chi autre sea fioi bastarde. Ma l modo de parlà é chel e le tradizion é compai, le ricerche dei linguisti parla anche ele ciaro…
L MUSEO DE LA LATARIA DE LOZE
La Società de la Lataria de Loze é davoi a mete n pe' n museo su la lavorazion de l late de na ota e verdarà par l'an che vien la Lataria par vede come che se fasea l late e l formai nte lataria e anche a Monte. N te sti mes se sta recuperando duto che che se dorea na ota e se sta fasendo n tin de storia de sta lataria.
I MULINS DE LOZE
Anche chesto é stou na bela sodisfazion: i Mulins de Loze é stade meteste n te n progeto europeo par la valorisazion de le vece fabriche de na ota: co n grupo de Francesi che i à da recuperà n mulin par fei carta, co un grupo inglese che i à un mulin par la farina e co n'autro grupo de la Slovenia. Un laoro che sta dendo avante e che fara vegni' un museo la vecia strada che fasea l'aga sul Rio Rin. Se vederà algo l'an che vien! (anche chesto é stou posibile parchè la Comunità Montana Centro Cadore à metesto metà dei schei)
L CD-ROM DE LE FOTO VECE DE LOZE
L insuda pasada avon finiu n CD-rom fato da Danilo De Martin e Mara Zampol de la Danil De Loze agnò che se puo' ciatà 300 foto vece da Loze co na breve descrizion sconpartide par agomento: i paes, i laore, l carneval, la banda … E inte se puo' sienti 6 storie de na ota da la vos de Catina e de Tino de Benci. Chi che vo lo puo' comprà da Albano a Loze (cartoleria de Meio)
Presentazione - Programmi - I ladini - Statuto - Novità
Mappa Sito - Link - Mail - Contattaci - Attività - Home
Copyright © Union Ladina del Cadore de Mèdo 
